Penyerakup Bansa Dayak Deka Nentu Ka The New Breed of Dayak

SIBU: Penyerakup Dayak ba politik nyadika batang pelasar dikena ngemujurka leka jaku Bansa Dayak Baru iya ke digelar ‘The New Breed of Dayak’ nyadi amat.

Chairman Parti Bansa Dayak Sarawak (PBDS) Sibu Julius Enchana madah, jaku nya deka ngemunka bansa Dayak ngembuan penemu megai ulu mai ti reti megai kuasa politik, ekonomi kelimpah macham atur dunya kemaya hari tu.

Ku iya, penemu nya deka nyadika jematan ti belalau ngagai bansa Dayak ngambika enda manggaika nasit bansa diri ngagai pegai jari orang bukai.

“Ari pengelebih ba penyerakup tu, bansa Dayak lantang ngaduka pekara ti enda betul, ngemanahka agi utai ti enda manah sereta nyeruri utai ti udah rusak.

“Nya alai, enti kitai bisi penyerakup, bansa kitai nadai bepenanggul ngubah genteran ba Kod Tanah Sarawak (SLC) ti besai reti ba pengawa ngambi pulai pengeraja enggau pengaya bansa Dayak iya ke beempu Tanah Adat Bansa Asal (NCR),” pia ku iya madah maya bejadi pengawa tamat kuntau nembiak Guro John Siang ba Kelang Kuntau Salim Belalang, empai lama tu tadi.

Julius ti mega Sekretari Raban Nembiak PBDS maya tu madah, penyerakup Dayak bela nentuka bansa nya megai kuasa ekonomi dikena ngangkatka bansa diri sereta ngemansangka ke menua.

Iya madah, ari nya mega, polisi ti bechiping ke dikemeran politik diatu bela deka dipunaska.

Ngelansa penumbuh PBDS, iya madah, bisi sekeda bepenemu madahka PBDS ditumbuhka semina dikena mambarka undi.

“Bisi mega madahka kami ti enggai nyemilik Gabungan Parti Sarawak (GPS) tauka Pakatan Harapan (PH) deka nyadika penanggul dua bengkah kuasa besai tu megai kuasa menua Sarawak.

“Aku deka nerang, enti maya orang nyau enda begunaka kitai agi, dia orang ke beempu rumah enda kakang ngesai lalu muru kita ari bilik sida.

“Kami PBDS enggai pekara tu nyadi, enggaika kitai nyau kampar dalam politik,” ku iya madah baru.

Bekenangka pengawa tamat sehari nya, Julius madahka pengawa nya sebaka enggau pengawa politik ke alai presiden parti ngelempaika pengarap ngagai nembiak baru bejalaika pemujur politik.

“Kitai meri puji ngagai Pencha Ajat Spring Sarawak ti betuaika Guro John Siang ketegal ti ransing ngetan sereta ngemeranka adat enggau main asal baka tu.

“Ari tu iya ukai semina ngerekaika penemu bekuntau tang ngerandang jalai ngagai nembiak baru ngasaika pengidup ti meruan sereta likun napi chura pengidup maya hari tu,” pia ku iya madah.

Maya pengawa tamat tu mega, Julius nerima pom nyadi raban PBDS ari Pencha Ajat Spring Sarawak.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s