PBDS Baru Mutus Betanding Ba 2 Penuduk Parlimen

Kuching – Parti Bansa Dayak Sarawak Baru (PBDS Baru) udah mutus ka betanding ba dua iti sitak parlimen ba Pengawa Bepilih Besai ti deka diatur 09 Mei tu ila. Chalun ti dipadu ka parti iya nya presiden sida Cobbold John ti deka betanding ba sitak P202 Sri Aman sereta Dr. Bego Sepop ba sitak P198 Puncak Borneo.

Ba penerang berita ti dipansutka, Ketuai Pengawa Bepilih parti madah ka, pemtus sida nuduk ka semina dua iku chalun bepelasarka gaya politik kemaya hari. Iya mega madah, sida semina nganjung chalun ke dipelaba ka ulih menang aja.

“PBDS Baru udah mutus nuduk ka dua iku chalun ti dipelabaka ulih menang aja ba PRU14 tu. Taja pan keterubah kami merambu deka nuduk ka chalun ba semua sitak, tang, ke beguna amat kitai numbang ke BN”, ku Rapelson.

PBDS Baru nyabung presiden sida Cobbold John ungkup P202 Sri Aman. Cobbold, 56 taun, siku orang dagang ti ngemeran ka pengawa betanam sawit bedandang mit. Ngembuan Master in Business Aministration (MBA) ari Sam Houstan State University, Texas, Amerika Syarikat. Siku ari aktivis rama sereta mega chakah ngetan ka pekara tanah NCR kelebih agi kes Ubah Pantu, Sri Aman. Cobbokd ke mega endang peranak asal menua Sri Aman sebedau tu udah enam kali bediri minta pilih. Pengeliat iya sekumbang bekau 26 taun dalam dunya politik ngujung ke iya dichiri nyadi presiden parti Dayak ba aum besai parti nya ba taun 2016 suba.

Siku agi chalun ti dipadu ka PBDS Baru mega ukai urang sengapa tang siku lutur perubat ti ngembuan Bsc Applied Science (Medical Technology) sereta ngembuan pelajar tikas ti tinggi Doctor of Medicine. Dr. Bego Sepop,53 taun, peranak asal Dayak Bidayuh ari Kampung Simboh, ba sitak Puncak Borneo. Bego ke mega kaban Kunsil Besai PBDS Baru, ngembuan peneleba gawa nyadi Scientist Lecturer ba Health Science College, Medical Labotary Consultant, kelimpah suah mangku pengawa nyadi menijar. Bego mega suah sereta chakah ngatur pengawa meri penerang bekaul enggau pengerai ba seluruh Malaysia.

“Aku ngarap, bansa Dayak enggau Sarawak sama meri sukung ngagai chalun kami lalu meri awak seduai ngarika bansa kitai bejaku ba parlimen Malaysia. Sukung seduai ba PRU14”, pia ku Rapelson.

Ari penerang nya, ulih dipeda pengelurus ati PBDS Baru ti dikumbai sekeda urang semina mecah ka undi, tang, ba serak tu sida udah terang madah semina betanding ba penuduk ti ulih menang. Dipelaba ka, pemutus tu beduduk ari misi numbang ka BN ba perintah besai. Sebedau tu, parti tu kala nawa mayuh raban lama PBDS udah mulai ka diri ngagai parti tu. Nitih ka pansik berita, parti tu udah ngirai chalun sida dikena napi PRN 12 ila. Sama datai ba aum tu kemari, Sapit Presiden, Patrick Anek Uren enggau Sekretari Besai, Anthony Nais.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s