Penemu Andy Dipejah Rapelson

Rapelson minta Andy ngererak “selapat” dalam PRS

Kuching – Ketuai Nembiak PBDS Baru mejah sebengkah penerang ti dipansut ka Ketuai Publisiti Nembiak PRS, Andy Lawrence ti nuduh PBDS Baru ngembuan penemu”mecahka Dayak” apin lama tu tadi. Penerang Andy tu bepun ari jaku timbal Ketuai Publisiti PBDS Baru, Bobby William ti madah ke pengalit ati diri bekaul enggau penerang Presiden PRS, Tan Sri James Masing ti ngambu diri ke ganti PBDS ti dulu suba.

Ba penerang iya, Rapelson ke mega Ketuai Komiti Bepilih parti, nyebut, penemu Andy semina jaku tempa dikena ngelabuh ka nama PBDS Baru ke majak angkat diatu. Ku iya nandu, pekara tu endang udah dijangka ketegal PRS ti enggai meda PBDS Baru.

“Sida ke dalam PRS tu orang ti enggai meda PBDS, nya kebuah sida mecah ke PBDS lalu numbuh ka PRS”, pia ku Rapelson.

Tang ku iya, PRS bedau ulih teganti ke PBDS ti dulu iya ti udah mujur ngempung bansa Dayak Sarawak begulai ba siti perabung politik. Iya mega madah kediri berasai malu ke ulah Andy ti enda cheremin dulu penumbuh PRS.

“Kaban parti endang ditulis ba konstitusyen, lalu nama parti pan PBDS Baru (Parti Bansa Dayak Sarawak Baru) iya nya PBDS ke dulu diidup ka disempulang nama Baru di belakang”, ku iya nerang.

“Ketegal mascot jani? Penerang udah ga dipadah ke enggau silik. Nama agi ka diterang? Besaut timbal jaku politik?”, pia ku Rapelson mejah penemu Andy seraya ngenang jaku Ketuai Nembiak PRS Snowdan Lawan beberapa bulan ke udah.

Ku Rapelson, Andy patut “ngererak selapat pangking” dalam PRS dulu sebedau kiruh ka parti bukai. Iya mega madah ka pemerani nembiak PRS semina ba bansa diri, tang, nadai seleka jaku dipansut ka nembiak PRS maya penemu presiden PRS Tan Sri Datuk Amar Dr. James Jemut Masing dipejah Sanib Said ba sebengkah penerang berita apin lama ke udah.

“Dayakism, tu meh agenda PBDS Baru. Kami nemu sereta ngasai ka diri diempit dua iti kuasa besai politik ari penegap penemu kami ti enggai nyemilik PH tauka BN”, pia ku Rapelson.

Kelimpah, Rapelson mega nawa PRS nyadi ijin bansa bukai mecah ka PBDS iya nya parti Dayak ti pemadu kering taun 2004 suba.

“Tang taja pia, sayap parti tu majak ngerembai sereta majak mansang ke mua. Mayuh raban Dayak tepelajar bisi dalam parti, tang, sida tu meh manuk sabung parti ke dudi hari”, ku Rapelson.

Rapelson mega madah, tu sebengkah ari kebuah semua piak nekan PBDS Baru laban enggai ka parti tu idup sereta kering baru nampung Agenda Dayak baka PBDS ke dulu. Iya mega madah semua konstitusyen parti endang sebaka enggau rintai Parti Bansa Dayak Sarawak ti dulu.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s