Cobbold : Penyerakup Dayak Dalam Politik Agenda Lumur Satu

Sri Aman – Parti Bansa Dayak Sarawak (PBDS) nengah penerang berita ti diterima ditu madahka, Penyerakup Politik tu sebagi ari Agenda Dayak ti ngembuan reti iya ke pemadu besai sereta meri empas ti berega ngagai bansa Dayak. Penyerakup Dayak dalam politik tu tau dikumbai “Indu Semua Agenda” laban ari penyerakup dalam politik tu, bansa kitai Dayak ulih bejalaika semua agenda Dayak ke bukai enggau lebih muntang.

Penyerakup Politik Dayak tu nyadi singkang keterubah dikena nempa Bansa Dayak Baru iya ti dikumbai The New Breed of Dayak. “Megai Ulu Mentality” tu mai reti megai kuasa politik, ekonomi sereta semua bengkah macham atur dunya kemaya hari. Ke alai, nengah kuasa penyerakup tu kitai ulih ngemetul ka pekara ti enda betul ngemanah ke utai ti enda manah sereta nyeruri utai ti udah rusak. Ambi ke banding, kitai ulih ngubah genteran Kod Tanah Sarawak (SLC) sereta mulaika pengeraja pengaya kitai ba tanah ngagai kitai ti beempu Tanah Adat Bansa Asal (NCR). Kitai mega ulih megai kuasa ekonomi dikena ngangkat ka bansa sereta ngemansang ka menua kitai sereta muai semua polisi ti bechiping ari perintah ti megai kuasa ke diatu.

Tang ku Cobbold, pekara tu ukai pekara iya ti muntang laban penyerakup politik Dayak bedau tentu nyengenda dipeda sereta empai bisi sebarang agenda bebatang ti ditempa nuju penyerakup politik.

“Kami dalam Parti Bansa Dayak Sarawak Baru endang ngasai ka nyerakupka Dayak dalam politik siti ari pengawa ti pemadu mar kelebih agi Bansa Dayak Sarawak ti ngembuan pupu raban bansa baka Iban, Bidayuh enggau Orang Ulu”, ku iya nerang.

“Aku, ti mangku pengawa nyadi presiden PBDS suah dikumbai orang bebagi bansa. Tang taja pia, tuduh ti datai ari bala kaban ari Barisan Nasional enggau Pakatan Harapan enda ngemantul ka ati kami ba PBDS ngering, negi sereta ngangkat ka bansa Dayak duduk sama baruh bediri sama bela peninggi enggau bansa bukai ti nguan menua Malaysia tu. Terima kasih ke sukung bala Supreme Kunsil, raban parti sereta mensia mayuh ti nyukung agenda penyerakup Dayak dalam Politik”, ku iya nerang enggau silik.

Cobbold ke mega chalun PBDS ba sitak parlimen P202 Sri Aman madah, bisi sekeda urang nelah pengada PBDS ti diidupka baru tu semina nyadi ka pemecah undi lalu ngumbai penemu kami ti enggai nyemilik BN sereta PH tu nyadi ka penanggul dua bengkah kuasa besai tu megai tampuk kuasa ba menua Sarawak.

“Aku meri lalau ngagai bala kita, bila maya nuan enda diguna, orang ti beempu rumah deka ngesai ka tikai lalu muru nuan ari nyemilik sida ti ngujung ka nuan nyadi kampar dalam politik”, ku Cobbold madah enggau nyemetak.

Nandu pekara ke sebaka, Cobbold bekunsi ka ulah sekeda raban orang ti suah bekelikuh ka nama parti tu lalu suah besebut ka pekara tu bakatu; PBDSB, PBDSb, PBDS. Iya nerang ngambika lantang sereta silik ditemu mensia mayuh lalu badu betalat ka agi, tu Parti Bansa Dayak Sarawak. Artikel 1 atur parti nyebut:

1. Deka bisi lalu ditumbuhka siti parti politik ti diberi nama Parti Bansa Dayak Sarswak Baru (jaku pandak PBDS) sereta dikumbai sebuah parti.

“Kitai sama bela ngingat ka jaku ti ditulis Professor Jayum Jawan Leadership and Development (Ketuai enggau Pemansang). Dalam bup iya nulis “agenda tu baka buah labuh puda enti enda disempulang enggau ati ti deka ngereja nengah politik. Kediatu, Iban dipeda aku nadai nuju sebengkah agenda dalam politik lalu nadai tuju dikena nyapai juluk ati”, ku Cobbold seraya ti ngamatka penemu iya.

Dayak semina dipeda bisi ngembuan penyerakup politik ba baruh siti parti maya Ming Court Affair 1987 ke alai maya tu BN (PBB, SUPP) belaban enggau MAJU Group (PBDS enggau PERMAS). Penyerakup politik Dayak maya tu baka api ti makai kampung puang sereta nyerarai ba seluruh menua Sarawak diulu ka Dato Seri Daniel Tajem, Tan Sri Leo Moggie, Datuk Edmund Langgu enggau Tan Sri James Jemut.

“Pengawa tu iya ti deka ditampung kami, penyerakup poltik. Kitai Dayak Baru enda tau nyadi orang gaji tauka orang ti diguna bansa bukai dalam politik tang kitai patut nengkebang penyerakup politik sereta negi ka bansa kitai empu”, ku iya madah.

“Diatu, 21st Century, Parti Bansa Dayak Sarawak (PBDS) udah diidupka baru nujah politik tasik besai menua Malaysia. Taja kami tu perau tang kami seruran bekayuh nuju adan. Tu meh palan endur kitai Dayak ruang bilik kitai dalam politik”, ku Cobbold seraya ngansak Dayak beserakup dalam pengawa politik.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s