Seraban Tuai Rumah Di Meluan Dikeduan Besainka Dokumen


Julau
– Sebengkah berita madahka seraban tuai rumah ba pelilih Julau udah kena keduan besainka dokumen ari siku veteran politik apin lama tu tadi. Nitihka penerang, dokumen nya disain dikena ngelakuka chalun baru ba Pengawa Bepilih Besai ke 14 ba sitak Parlimen Julau.

Bala tuai rumah tu nyengkaum Tuai Rumah Batik, Tuai Rumah Awit, Tuai Rumah Mancha, Tuai Rumah Ringgit Jampong, Tuai Guyu enggau beberapa iku tuai rumah ke bukai ari Nanga Mujok, Nanga Buloh enggau Nanga Apo. Nitihka penerang berita ti dipansutka, pekara tu diterangka maya randau begulai enggau Kaban Parlimen Julau Datuk Joseph Salang Gandum di Rumah Sabang Raoh, Rantau Limau maya Program Pemesai Begulai Enggau Rakyat.

Sida sebuat madahka diri udah dikangau ka ex-Tuai Rumah Balang ngulu program merarau di Sarikei ti diatur Kaban Kunsil Nengeri Meluan, Rolland Duat (BN-PDP). Nitihka penerang Tuai Rumah Awi ari Nanga Mujok, tajapan nadai surat bebatang tang sida ngulu program tu laban pechaya ka aum tu diatur ADUN Meluan, Rolland Duat. Taja pia, maya program nya sida tekenyit laban nadai meda pengari Meluan (YB Rolland Duat) tang semina meda ex-Kaban Parlimen Julau, Datuk Sng Chee Hua enggau bala bukai.

Nitihka penerang ari Tuai Rumah Awit, Datuk Sng ngangau ke sida ke restoran di Sarikei, lalu sida sebuat dikangau ka Sng ke bilik sereta diasuh nyain dokumen, tebal agi sida enda nemu tuku dokumen ti disain nya. Taja pia, Sng nadai madah sekalika iya deka nirika anak iya Larry Sng ba PRU14 tu ila. Kelimpah, Tuai Rumah Guyu enggau Tuai Rumah Ringgit madahka seduai sama bela diasuh nyain dokumen lalu bisi nerima duit sepenyampau RM250 seraya RM50 da agi ungkup ba dokumen nya.

Datuk Joseph Salang ba berita ti dibantaika Utusan Borneo ngelalau bala Tuai Rumah ngambika enda ngeletak sebarang sain ngapa.

“Ba kes tu, kita semua udah nyain dokumen ka madah ka kita nyukung ukai chalun BN bediri ba Parlimen Julau enggau nadai berandau enggau nembiak redak kita empu dulu”, ku Salang.

“Kita mega udah dibayar enggau mata duit nyadi pemeri enda ditemu kita nama pangka iya”, ku Salang nerang.

Datuk Sng Chee Hua ke kala nyadi Kaban Parlimen Julau sepengelama sepenggal iya nya ari taun 1995 ngagai taun 1999. Sng ke kala nyadi Mandal Kanan Presiden Parti Bansa Dayak Sarawak (PBDS) dipeda suah beguna ka chara politik kamah ba bansa Iban. Maya penyarut PBDS suba, Sng diberitaka kala masang Josephine Randan Mawat (chalun bebas) nyatup sereta nguji ngelabuh ka Datuk Joseph Salang ba Parlimen Julau. Ba pengawa bepilih besai taun 2004 tu suba, Salang mujur ngalahka Josephine enggau 2688 undi majority ke alai iya bulih 8388 undi lalu Josephine bulih 5700 iti undi.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s