Politik: Pangka Bena P202 Sri Aman


Sri Aman
– Dipelabaka tiga iku nama besai politik Dayak deka besatup ba pengawa Bepilih Besai PRU 14 P202 Sri Aman ti deka datai. Tiga iku nama besai ti udah mantai ka niat ati diri bediri minta pilih tu iya nya Mandal Presiden Parti Rakyat Sarawak (PRS) Datuk Masir Kujat iya ke mega penyandang penuduk P202 Sri Aman sereta Sapit Menteri Dalam Menua Malaysia. Masir sebedau tu diberita ka deka ditukar enggau Ketuai Indu PRS, Datuk Doris Sophia Brodie dipeda regas amat bejadi pengawa ti diatur agensi opis perintah ba pelilih sitak Sri Aman.

Masir, 63, keterubah dipilih nyadi MP Sri Aman nganti Jimmy Donnold Lim ba pengawa Bepilih Besai PRU12 taun 2008 ke alai iya mujur ngalah ka Cobbold John (BEBAS) ba pengawa betenggali alan sereta bulih 9700 undi lalu Cobbold John 5448 iti undi. Ba taun PRU13 taun 2013  Masir mega mujur ngenan ka penuduk iya ngalah ka Nicholas Mujah Ason (PKR) enggau 12168 iti undi lalu Mujah bulih 5618 iti undi. Pemujur ngenanka penuduk ba PRU13 meri awak Masir dipilih mangku pengawa nyadi Sapit Menteri Dalam Menua ba taun 2015 nyentuka diatu.

Tang serak tu, dibai faktor umur sereta laya dalam PRS, dipelabaka populariti Masir deka jauh labuh ari ke udah. Berindik ari jaku Presiden PRS ti deka ka orang indu nyadi chalun sereta pengari rakyat Dayak ba pelilih menua Malaysia. Kontroversi dalam parti tu dipelaba deka meri empas besai ka penuduk Masir ba Sri Aman. Kaul Masir enggau perintah besai mega dipeda siti ari empas ke enda manah ketegal Menteri Besai Datuk Seri Najib Razak ti dipukung enggau skandal 1MDB, GST, peniki rega barang sereta rega minyak.

Siku ari chalun ti deka bediri minta pilih tu iya nya nama ti ditemu mayuh dalam politik Sarawak sereta mega presiden Parti Bansa Dayak Sarawak Baru (PBDS Baru). Siku orang ti regas bejalaika pengawa ngeringka bansa Dayak lalu 8 taun biak ari Masir. Tikas umur ti bebida deka meri pengeregas ngagai Cobbold ngarika rakyat menua Sri Aman ba parlimen Malaysia. Cobbold ti dipilih nyadi presiden PBDS Baru kenyau ari bulan tujuh 2016 dipeda berani bejaku negi ka bansa Dayak sereta enda leju ngemanaka isu bekaul enggau bansa Dayak baka kes tanah NCR, isu kad pengelala, dagang, pangku pengawa ba opis perintah sereta ngembuan ulah ti ngemaruhka diri. Ngembuan Master in Business Adminstration ari Sam Houston State University, Texas USA sereta siku orang ti mujur ngemunka diri dalam  pengawa betanam betupi.

Sebedau tu, Cobbold kala minta perintah ngamatka janji ngaga padang bilun ba Batang Ai tang jaku iya nadai timbal ari perintah. Iya mega dipeda ngembuan runding dulu sesingkang lalu besemaya deka mantai ka langgur numbuhka universiti Dayak keterubah di Parlimen Malaysia enti rakyat Sri Aman meri awak iya ngarika sida. Suah dipeda begulai enggau orang kuat PBDS Dato’ Seri Daniel Tajem ke mega ex Sapit Kepala Menteri deka meri pengelebih ngagai Cobbold ngangkat ka bansa Dayak menua Sarawak sereta ngidupka baru semengat Dayakism PBDS 1987. Cobbold ke mega kala nyadi Ketuai Cabang PKR Sri Aman sebedau tu dipeda ngembuan kaul ti kering ba akar umbi.

Chalun ti ke penudi Nicholas Mujah Ason siku aktivis rama sereta Sekreteri Besai SADIA mega siku orang ti regas sereta chakah bejalaika pengawa ke bansa Dayak sereta suah ngembing rakyat ti betapi enggau penusah tanah NCR. Mujah enggau Cobbold sama bela ngembuan kaul ti rat kenyau ari taun 1997 dipeda sama bela chakah nukar Masir ba Sri Aman. Apin lama tu tadi, bisi sebengkah berita dipansutka ba media rama ti madah ka Mujah deka dichalunka PBDS ba P200 Batang Sadong laban penatai ia ari Kpg Ensika Simunjan tang Mujah madahka berita nya selebubu laban nadai aum entara iya enggau PBDS udah digaga. Tanda tanya, sekalika Mujah sanggup ngeleka niat ati bediri minta pilih lalu meri Cobbold awak besatup enggau Masir Kujat tauka tiga penjuru deka nyadi ba P202 Sri Aman?

Mujur enda Masir ngenanka penuduk iya dibai bena rebak baru P202 Sri Aman? Sekalika rakyat Sri Aman meri awak parti PBDS ti diidupka baru ngayuhka perau diriempu ba politik Malaysia?

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s